Президент Рамзан Қодиров меҳмонлар учун мағрур кўкрак керадиган бунёдкорлик ишлари -Грозный ситидаги кўп қаватли уйлардир. Шаҳарнинг кўрки бўлмиш, энг баланд, "тож”ига соат ўрнатилган уйдан президент актёр Жерар Депарьега ҳам битта хонадон совға қилганди. Бир неча кунлар олдин Рамзаннинг севимли уйига ўт кетгани кўпчиликни ларзага солди. Муҳташам кўп қаватли уйнинг "юзи” оловдан қорайиб кетди. Ўт кетиш сабаблари ўрганилмоқда. Президентга кўра, яқин кунларда қайта таъмирлаш ишлари бошланади ва севимли уй яна ўз ҳолига қайтарилади.

Жасур

Етти йил олдин яратилган ижтимоий тармоқ бугунга келиб жуда оммалашиб кетди. Маълумотларга қараганда, "однокласснки.ру” сайтига кундуз кунлари 38 миллиондан ортиқ фойдаланувчи ташриф буюради. Ўзбекистонда 1 миллиондан ортиқ "мухлис”ига эга тармоқ 4- апрел давомида ишламагани фойдаланувчиларни хавотирга солди. Сайт ходимларидан бирининг твиттерда берган хабарига кўра, "однокласснки.ру”га хакерлик ҳужуми уюштирилган. Айни пайтда фойдаланувчиларнинг саҳифалари очилса-да, техник носозликлар бартараф этилаётгани ҳақида "қора лента”да маълумот мавжуд.

Биринчи мобил алоқа бундан 40 йил олдин АҚШда амалга оширилган эди. "Моторола” компанияси томонидан яратилган уяли телефон оғирлиги 1,5 кг.ни ташкил этиб, пластик қопчага солинган ғиштни эслатарди! 1973 йил, 3-апрелда Нью-Йоркда одамлар кўз ўнгида қилинган биринчи қўнғироқ эгаси Мартин Купер бўлди. Илк қўл телефони Motorola DynaTAC 8000x бўлиб, 22,5 см. ҳажмдаги телефон тўлиқ заряд олганида 20 дақиқа гаплашишга имкон бор эди. Бугун дунёда тахминан 7 миллиард мобил телефонлари мавжуд бўлиб, уларнинг русумлари бир неча минг хилни ташкил этади. "Уяли телефон отаси” Мартин Купернинг ёши 84 да бўлиб, ҳалигача шу соҳада фаолият юритади.

Жасур ҲАМРОЕВ