Жиноят ишлари бўйича Тошкент шаҳар суди "МТС-Ўзбекистон”нинг 4 нафар ходими киритган даъво аризаси бўйича октябр ўрталарига белгиланган аппеляция судини шу ойнинг сўнгги кунларига қолдирди.  «Ўздунробита»  алоқа оператори лицензиясини бекор қилиш қарорининг қанчалик қонунийлигини аниқлаш кутилган маҳкама ҳам айни октябр ойининг охирига қолдирилди. Сабаблар эса сирлигича қолди.

Маҳкамаларнинг ортга сурилишида бошқа бир маъно бордек. Яна ортга қайтиш бобида умид учқуни. Балки, янада чуқур ўйлаш, якуний хулосага шошмаслик ё чиқарилган тўхтамни қайта кўриш, жоиз бўлса ўзгартириш режаси туғилгандир?! Нима бўлганда ҳам, элнинг доно нақли "жўжани кузда санаймиз”га роса амал қилишмоқда! Айни куз кунларида яна! Йиллар мобайнида компания лейблида – кўзимизга фақат битта тухум,  оппоқ ягона тухум кўринарди. "МТС-Ўзбекистон” – "инкубаторлик” қилиб, тухумлар сони аслида биз ўйлаганимиздан бир неча минг маротаба кўп эканини улардан жўжа чиқариш мавриди келганини тегишли органлар пайқаб қолганига нима дейсиз?

Хуллас, "жўжалар” санаб бўлингач, "эга”ларнинг яна мобил бозорга қайтишларига йўл очиб берилар?  Ҳозир одамларни битта нарса қизиқтирмоқда: ким ҳақ, ким ноҳақ бу муҳим эмас! Тезда компания иш бошласаю, ҳамма қадрдон ва ёд бўлиб кетган рақамлари орқали дўсту ёрларини топишса!

Маълумотларга қараганда, "МТС” компанияси Ўзбекистондаги бизнесини тараққий эттириш учун 1 миллиард АҚШ долларидан ортиқроқ маблағ сарфлаган. 8 йил мобайнида фаолият юритган компаниянинг яна бир ўз ишига "айёр”лиги, улар ўрнатган алоқа ускунларида бошқа "уяли алоқа”чилар ишлай олмайди!  Шунинг учун бўшаган ўринга кўз тикиш бефойда: ё МТС, ё ҳеч ким!

Озгина хуши сезилган хабар ҳозирча тахмин билан қариндош тутиниб туради. Вақт эса барчасига ойдинлик киритади. Биргаликда кузатамиз.

МАВЗУ ЮЗАСИДАН ФАКТЛАР:

1. "МТС-Ўзбекистон” фаолияти тўхтатилиши ортидан уяли алоқа тизими сифатининг ёмонлашуви сезилди. 9 миллиондан ортиқ абонент иккига бўлинди:  "Юселл” ва "Билайн”га "кутилмаган омад” ёғилиши катта муаммолар ҳам туғдиргандир?!

2. "МТС”нинг Москвадаги матбуот котибаси В.Кузменко жағи ёз ойида ҳеч тинмаганди. Айни пайтда "қайтиш” умиди ҳақида гапиришга келганда, оғзига талқон солиб олган.

3. Россия Федерацияси ИИВ тергов департаменти "МТС-Ўзбекистон" ширкатининг Ўзбекистондан сиқиб чиқарилгани юзасидан жиноий иш қўзғотган эди. Бироқ, тергов тафсилотлари ҳануз сир бўлиб қолмоқда.

4. Россиядаги нуфузли нашр "Коммерсантъ”га кўра, "МТС”нинг рақиблари  "UcelI”  ва "Uzmobile” рақобат муҳитини бузган.

Жасур ҲАМРОЕВ